Home राजधानी मुंबई कोविड योद्ध्यांचे कार्य अभिनंदनीय : राज्यपाल

कोविड योद्ध्यांचे कार्य अभिनंदनीय : राज्यपाल

46

मुंबई  : शासकीय रुग्णालयातील डॉक्टर, अधीक्षक, प्राध्यापक, प्रमुख व्यवस्थापिका (मेट्रन), स्वच्छता निरीक्षक आणि सर्व वैद्यकीय अधिकारी-कर्मचारी कोरोना महामारीच्या संकट काळात निष्ठेने सेवा करीत आहेत. या सर्व कोविड योद्ध्यांचे कार्य अभिनंदनीय असल्याचे प्रतिपादन राज्यपाल भगत सिंह कोश्यारी यांनी केले.
कोविड १९ या जागतिक महामारीच्या काळात मुंबईतील सेंट जॉर्ज रुग्णालय, द कामा अँड अलब्लेस रुग्णालय, गोकुलदास तेजपाल (जीटी) रुग्णालय आणि जे.जे. रुग्णालयातील कोविड वॉरियर्सचा राजभवन येथे सत्कार करण्यात आला. यावेळी अभिनंदनपर भाषणात राज्यपाल कोश्यारी बोलत होते.
माता-पिता-गुरू आणि देव यांचे आयुष्यातील स्थान महत्त्वाचे आहे. यामध्ये आपण देवाला पाहिले नाही; परंतु जेव्हा प्रकृती खराब होते, तेव्हा आपल्याला डॉक्टरच आठवतात आणि हेच आपल्यासाठी देव आहेत. कोरोना रुग्णांना अतिशय प्रेमाने आणि माणुसकीने शासकीय उपचार देण्यात येत आहेत. राजभवन येथील अनेक कर्मचाºयांना कोरोनाने ग्रासले होते. आज सर्वजण ठणठणीत आहेत. अशाचप्रकारे आर्थिकदृष्ट्या गरीब रूग्णही पूर्णत: स्वस्थ होणे गरजेचे आहे आणि तेच आपले कर्तव्य असून, पुढेही आपल्याकडून असेच कार्य सुरू राहावे, अशी अपेक्षा त्यांनी व्यक्त केली. या कालावधीत कार्यरत ज्या वैद्यकीय कर्मचाºयांना प्राण गमवावे लागले त्यांना श्रद्धांजली अर्पण करून त्यांच्या कुटुंबियांना सुदृढ आरोग्य लाभावे, ही भावनाही राज्यपाल कोश्यारी यांनी व्यक्त केली.
वैद्यकीय शिक्षण आणि संशोधनचे संचालक डॉ. तात्याराव लहाने म्हणाले, की डॉक्टर, अधीक्षक, प्राध्यापक, प्रमुख व्यवस्थापिका (मेट्रन), स्वच्छता निरीक्षक आदींसोबत वैद्यकीय क्षेत्रातील सर्वच कर्मचारी उत्तम काम केले आहे. सुरुवातीला कोविड-१९ संदर्भात अधिक माहिती नसल्याने अनेक अडचणी आणि रुग्णांच्या मृत्युला सामोरे जावे लागत होते. मात्र, या परिस्थितीतही सर्व कर्मचारी तत्पर आहेत. सुरुवातीला तीनच प्रयोगशाळा होत्या. मात्र, आज १५४ लॅब, १४९० व्हेंटीलेटर, १६५० आयसीयू बेड, तीन लाख सात हजार बेड, १८ मेडिकल कॉलेजेस उपलब्ध आहेत. सुरुवातीला मृत्युदर ५० टक्के होता, तो सध्या २.६ टक्के आहे आणि हाच मृत्युदर शून्य टक्क्यावर नेण्यासाठी सर्वजण प्रयत्नशील आहेत. शासनाच्या ‘माझे कुटुंब, माझी जबाबदारी’अभियानाअंतर्गतही काम सुरू असून, शून्य टक्के मृत्युदरापर्यंत पोहोचण्याचे लक्ष्य लवकरच पूर्ण करू, असा विश्वास डॉ. लहाने यांनी व्यक्त केला.
कार्यक्रमात राज्यपालांचे प्रधान सचिव संतोष कुमार यांनी मनोगत व्यक्त केले. कोरोनामुक्त झालेल्या अनेकांनी अनुभव कथन केले. जे.जे. रुग्णालयाचे अधिष्ठाता डॉ. रणजित मानकेश्वर, राज्याच्या कोविड लॅबरॉटरीचे नियंत्रक डॉ. सचिन मुलकुटकर आदींसह ३३ कोविड वॉरियर्सना प्रमाणपत्र प्रदान करत सत्कार करण्यात आला. (महासंवाद)

 

LEAVE A REPLY

Please enter your comment!
Please enter your name here