Home राजधानी मुंबई धनगर समाजाच्या आर्थिक विकासासाठी सकारात्मक पावले उचलणार

धनगर समाजाच्या आर्थिक विकासासाठी सकारात्मक पावले उचलणार

121

मुंबई : धनगर समाजाच्या आर्थिक विकासाच्या व अन्य मागण्यांबाबत सकारात्मक पावले उचलली जातील. आरक्षणासाठी सातत्यपूर्ण पाठपुरावा करण्यासाठी कायदेतज्ज्ञ आणि विविध घटकांशी समन्वय साधला जाईल, असा विश्वास मुख्यमंत्री उद्धव ठाकरे यांनी धनगर समाज शिष्टमंडळाला दिला.
धनगर समाजाच्या आरक्षण व विविध मागण्यांबाबत शिष्टमंडळाने मुख्यमंत्री ठाकरे यांची शुक्रवारी सह्याद्री अतिथीगृह येथे भेट घेतली. त्यावेळी ते बोलत होते.
बैठकीला मदत आणि पुनर्वसन मंत्री विजय वडेट्टीवार, परिवहन मंत्री अनिल परब, मृद व जलसंधारण राज्यमंत्री दत्तात्रय भरणे, खा. अनिल देसाई यांच्यासह मुख्य सचिव सीताराम कुंटे, मुख्यमंत्र्यांचे अतिरिक्त मुख्य सचिव आशिषकुमार सिंह, वित्त विभागाचे अतिरिक्त मुख्य सचिव राजगोपाल देवरा आदी उपस्थित होते.
मुख्यमंत्री ठाकरे म्हणाले, की धनगर समाजाच्या आरक्षणाची मागणी खूप जुनी आहे. त्यामुळे या विषयाची कोंडी फोडण्यासाठी करता येतील, ते सर्व प्रयत्न केले जातील. आरक्षणाच्या मार्गातील अडथळा दूर करण्यासाठी कायदेतज्ज्ञआणि विविध घटकांशी विचारविनिमय करून सल्ला घेतला जाईल. समाजाच्या विकासासाठी योजनांच्या आर्थिक तरतुदीबाबत निश्चितच सकारात्मक प्रयत्न होतील, असेही त्यांनी सांगितले.
मदत व पुनर्वसन मंत्री वडेट्टीवार यांनी धनगर समाजाच्या आरक्षणाच्या मागणीबाबत विविधस्तरांवर पाठपुरावा केला जाईल, असे स्पष्ट केले.
बैठकीत माजी आमदार प्रकाश शेंडगे, माजी मंत्री अण्णा डांगे, रमेश शेंडगे, खा. विकास महात्मे, रामराव वडकुते, माजी आमदार अनिल गोटे, गणेश हाके, सुभाष खेमनार, उज्ज्वला हाके आदींनी आरक्षण आणि विविध मागण्यांच्या अनुषंगाने मांडणी केली.

LEAVE A REPLY

Please enter your comment!
Please enter your name here