देश

बायडन,ट्रम्प यांच्यात जोरदार टक्कर

(Last Updated On: November 4, 2020)

नवी दिल्ली : मंगळवारी पार पडलेल्या राष्ट्राध्यक्षपदाच्या निवडणुकीत जो बायडन आणि विद्यमान राष्ट्राध्यक्ष डोनाल्ड ट्रम्प यांच्यात जोरदार टक्कर असल्याचे दिसून येते. अद्याप मतमोजणी सुरू असून अंतिम निकाल काही तासांत येण्याची शक्यता आहे. ( us president election )
अटीतटीच्या लढतीत डोनाल्ड ट्रम्प यांनी अखेर अत्यंत महत्त्वाच्या असलेल्या फ्लोरिडा, टेक्सास या राज्यांमध्ये विजय मिळवला आहे. राष्ट्राध्यक्षपद कायम राखण्यासाठी ट्रम्प यांना या राज्यात विजय अत्यंत आवश्यक होता.
योगायोग असा, की सन २००० सालापासून राष्ट्राध्यक्षपदाच्या निवडणुकीत ज्या उमेदवाराने फ्लोरिडामध्ये विजय मिळवला, त्याने पुढे राष्ट्राध्यक्षपदाची निवडणूक जिंकलेली आहे. फ्लोरिडाशिवाय कुठल्याही रिपब्लिकन उमेदवाराला व्हाइट हाऊसची शर्यत जिंकता आलेली नाही. २०१६ मध्ये ट्रम्प यांनी हिलरी क्लिंटन यांच्यावर फ्लोरिडात केवळ एक टक्का मतांच्या फरकाने विजय मिळवला होता.
जो बायडेन आणि डोनाल्ड ट्रम्प दोघांनी फ्लोरिडामधील प्रचारावर विशेष भर दिला होता. ट्रम्प यांनी ओहायो आणि लोवामध्ये सुद्धा विजय मिळवला आहे. सध्याच्या मतमोजणीच्या निकालानुसार, जो बायडेन आणि डोनाल्ड ट्रम्प अनुक्रमे 225 आणि 213 जागांवर आहेत.