महाराष्ट्र जीएसटीमार्फत 2100 कोटींचा घोटाळा उघड

राजधानी मुंबई

मुंबई : राज्याच्या वस्तू व सेवाकर (जीएसटी) विभागाने कारवाई करीत तब्बल 2100 कोटी रुपयांचा घोटाळा उघड केला आहे. याप्रकरणी दिलीपकुमार रामगोपाल तिब्रेवाल या व्यक्तीला अटक करण्यात आली आहे. 30 वेगवेगळ्या कंपन्यांच्या नोंदणीचा वापर करून 2100 कोटी रुपयांपेक्षा जास्त बोगस विक्री चलान जारी केले असल्याची माहिती समोर आली आहे.                                                              राज्यकर सहआयुक्त, अन्वेषण-ब, वस्तू व सेवाकर विभाग, माझगांव, मुंबई या कार्यालयामार्फत केलेल्या तपासानुसार दिलीपकुमार रामगोपाल तिब्रेवाल यांनी स्वत:च्या कुटुंबियांच्या नावे एकूण 4 कंपन्यांची महाराष्ट्र/केंद्रीय वस्तू व सेवाकर कायदा 2017 कायद्याखाली नोंदणी केली असून इतर 26 कंपन्यांची विविध लोकांच्या नावे महाराष्ट्र /केंद्रीय वस्तू व सेवाकर कायद्याखाली नोंदणी करुन घेतली आहे. या 30 कंपन्यांच्या आस्थापनांच्या नावे सदर व्यक्ती दिलीपकुमार रामगोपाल तिब्रेवाल यांनी 2100 कोटी रुपयांच्याहून अधिक रकमेची बोगस विक्री बिले, कोणत्याही वस्तू वा सेवा यांचा कोणत्याही प्रकारे प्रत्यक्ष पुरवठा न करता निर्गमित केली आहेत. व त्या माध्यमातून 185 कोटी रुपयांचा बोगस Input Tax Credit  इतर अनेक कंपन्यांना उपलब्ध करुन दिला असून त्याद्वारे शासनाच्या महसुलाचे तितक्या रकमेचे नुकसान केले आहे. असे कृत्य हे महाराष्ट्र वस्तू व सेवाकर कायद्यानुसार दखलपात्र व अजामीनपात्र स्वरुपाचा गुन्हा आहे.
दिलीपकुमार रामगोपाल तिब्रेवाल यांचा संचालक या नात्याने 23 नोव्हेंबर 2020 रोजी त्यांच्या मालाड (प), मुंबई येथील निवासस्थानामधून सकाळी 7.30 वाजता पंच व पोलीसांच्या उपस्थितीत राज्यकर सहआयुक्त, अन्वेषण-ब, मुंबई यांच्या कार्यालयाकडून अटक करण्यात आली असून ही कार्यवाही महाराष्ट्र वस्तू व सेवाकर कायद्याच्या कलम 69 नुसार करण्यात आली आहे. तिब्रेवाल यांना अतिरिक्त मुख्य महानगर दंडाधिकारी  Esplanade, मुंबई यांच्या न्यायालयाकडून 5 डिसेंबरपर्यंत न्यायालयीन कोठडी सुनावण्यात आली आहे. सदर कार्यवाही राज्यकर आयुक्त संजीव कुमार, सह आयुक्त (अन्वेषण) संपदा मेहता यांच्या मार्गदर्शनाखाली उपायुक्त सत्यजीत भांड, एस.पी. सरावणे व सहायक राज्यकर आयुक्त आशिष कापडणे यांच्या पथकाने केली असल्याचे या कार्यालयाने प्रसिद्धी पत्रकान्वये कळविले आहे.

Leave a Reply

Your email address will not be published. Required fields are marked *